Hækkanir á evrópskum mörkuðum

Evrópskar kauphallir hækkuðu í dag eftir að Seðlabanki Bandaríkjanna gaf í skyn að bankinn væri ekki lengur á þeirri vegferð að hækka stýrivexti sína.

Frankfurt hækkaði um 3,1 prósent, París um 2,5 prósent og London um 2,2 prósent. Seðlabankinn tilkynnti um það í morgun að hann hefði ekki áform um að hækka stýrivexti, þvert á móti muni bankinn taka mið af efnahagsástandi í landinu við ákvörðun vaxtastigs.

Jerome Powell seðlabankastjóri Bandaríkjanna sagði í morgun að hagtölur gæfu til kynna að bandaríska hagkerfið stæði vel en að fjármálamarkaðir hefðu áhyggjur af þróuninni í Bandaríkjunum og Kína.

Powell segir að Seðlabanki Bandaríkjanna sé tilbúinn að vera sveigjanlegur og bregðast við hagsveiflum til þess að styðja við hagkerfi landsins.

• Blogga um frétt