Mátti ekki skrá upplýsingar

Creditinfo.
Creditinfo. mbl.is/Ernir

Persónuvernd hefur komist að þeirri niðurstöðu að Creditinfo-Lánstrausti hf. hafi ekki verið heimilt að safna úr hlutafélagaskrá upplýsingum um stöðu einstaklings sem varamanns í stjórn tveggja félaga sem úrskurðuð höfðu verið gjaldþrota og nota þær upplýsingar í því skyni að skrá hann á vanskilaskrá fyrirtækisins.

Fram kemur í úrskurði Persónuverndar að Creditinfo-Lánstraust hf. hafi talið sig hafa heimild til skráningarinnar með vísan í ákvæði starfsleyfis félagsins þess efnis að því væri heimilt að safna upplýsingum frá hlutafélagaskrá um stofnendur, stjórnarmenn og framkvæmdastjóra hlutafélaga og einkahlutafélaga enda hefðu þeir staðið að í það minnsta tveimur slíkum félögum sem úrskurðuð hefðu verið gjaldþrota síðustu fjögur ár á undan. Í hlutafélagaskrá birtust upplýsingar um stjórnarmenn og varamenn.

Rétt að túlka ákvæðið fremur þröngt

Persónuvernd komst að þeirri niðurstöðu að þar sem um íþyngjandi ákvæði væri að ræða væri rétt að það væri túlkað fremur þröngt en samkvæmt orðanna hljóðan tæki það aðeins til stjórnarmanna en ekki varamanna. Greinarmunur væri gerður þar á í lögum um hlutafélög og lögum um einkahlutafélög. Enn fremur væri í umræddu ákvæði starfsleyfisins vísað til þeirra sem hefðu staðið að viðkomandi félögum.

Félaginu væri samkvæmt reglugerð um söfnun og miðlun upplýsinga um fjárhagsmálefni og lánstraust aðeins heimilt að vinna upplýsingar sem í eðli sínu hefðu afgerandi þýðingu við mat á fjárhag og lánstrausti hins skráða. Vafi væri á því að mati Persónuverndar að upplýsingar um stöðu einstaklingsins sem varamanns væru áreiðanlegar upplýsingar um aðkomu hans að stjórn umræddra félaga og þar með væri vafasamt að þær hefðu afgerandi þýðingu við mat á fjárhag og lánstrausti hans.

Fyrir vikið væri Creditinfo-Lánstrausti hf. ekki heimilt að safna úr hlutafélagaskrá upplýsingum um stöðu umrædds einstaklings sem varamanns í stjórn tveggja félaga sem úrskurðuð höfðu verið gjaldþrota á síðustu fjórum árum á undan og nota þær upplýsingar í þeim tilgangi að skrá hann á vanskilaskrá fyrirtækisins.

mbl.is
Fleira áhugavert
  ISK
  USD
  EUR
  GBP
  CAD
  DKK
  NOK
  SEK
Fleira áhugavert
  ISK
  USD
  EUR
  GBP
  CAD
  DKK
  NOK
  SEK