Áfrýjunarnefnd samkeppnismálagilding staðfesti í dag ógildingu á kaupum Lyfja og heilsu á Apóteki MOS, en Samkeppniseftirlitið ógilti í október í fyrra áformaðan samruna með kaupum Lyfja og heilsu hf. á Opnu ehf. (Apóteki MOS). Frá þessu er greint á vef Samkeppniseftirlitsins.
Lyf og heilsa rekur 30 apótek um landið, annars vegar undir heitinu Lyf og heilsa og hins vegar Apótekarinn. Eru Lyf og heilsa einn stærsti lyfjasmásali á landinu. Opna rekur hins vegar eitt apótek í Mosfellsbæ, Apótek MOS og var það apótek opnað um mitt ár 2016. Áður en Apótek MOS hóf starfsemi var eitt apótek í Mosfellsbæ, Apótekarinn sem er í eigu Lyf og heilsu. Eru Apótek MOS og Apótekarinn einu lyfjaverslanirnar í Mosfellsbæ í dag.
Rannsókn Samkeppniseftirlitsins er sögð hafa sýnt að innkoma Apóteks MOS hafði „mjög góð áhrif á samkeppni á svæðinu. Bauð Apótek MOS upp á nýja þjónustu í formi skipulags verslunarinnar og aðstoðar lyfjafræðinga. Einnig var opnunartími lengri en áður hafði tíðkast í Mosfellsbæ. Sýndu gögn málsins að neytendur tóku þessum nýja valkosti vel og hafði samkeppni frá Apóteki MOS veruleg áhrif á rekstur Apótekarans í Mosfellsbæ,“ að því er segir í fréttinni.
Upplýst var í málinu að Lyf og heilsa hefði sett sig í samband við forsvarsmann Apóteks MOS um kaup á félaginu og samningar hefðu náðust. Hefði samruninn orðið að veruleika þá „hefði sú samkeppni sem Apótek MOS veitti umræddu útibúi Lyfja og heilsu horfið.“
Leiddi rannsókn Samkeppniseftirlitsins í ljós að lyfsala í Mosfellsbæ er mjög staðbundin og að neytendur kjósa almennt að eiga viðskipti við apótek sem eru sem næst heilsugæslustöðvum/læknastofum eða heimilum þeirra. Þetta eigi ekki síst við í tilviki aldraðra eða þegar aðkallandi er að fá lyf í hendur. Samruni umræddra apóteka myndi því valda viðskiptavinum þeirra „verulegu samkeppnislegu tjóni“.
Lyf og heilsa kærði ákvörðun Samkeppniseftirlitsins til áfrýjunarnefndar, sem féllst ekki á það með fyrirtækinu að rannsókn eftirlitsins hefði verið gölluð, eða að það hefði lagt rangt mat á skilgreiningu markaðar málsins eða samkeppnisleg áhrif samrunans.
Var ógilding Samkeppniseftirlitsins því staðfest.