Laun bankastjóranna lækkuð
Setja bókamerki
Í bréfi sem formaður stjórnar Bankasýslu ríkisins hefur sent Bjarna Benediktssyni, fjármála- og efnahagsráðherra kemur fram að breyting verði á launum bankastjóra Landsbankans og Íslandsbanka.
Í bréfinu segir að Bankasýslunni hafi borist bréf frá Friðriki Sophussyni, formanni stjórnar Íslandsbanka, 9. mars þar sem greint er frá því að stjórnin hafi ákveðið að „frá og með 1. apríl nk. verða laun Birnu Einarsdóttur, bankastjóra Íslandsbanka, 3.650.000 kr. á mánuði án hlunninda. Í þessu sambandi er vert að benda á að laun bankastjóra án hlunninda, sem eru nú 4.200.000 kr. á mánuði, námu 3.850.000 kr. á mánuði þegar ríkissjóður eignaðist allt hlutafé í bankanum árið 2016.“
Bankasýslan segir að samkvæmt upplýsingum stofnunarinnar séu hlunnindi bankastjóra Íslandsbanka 200.000 kr. á mánuði og því nemi heildarlaun ásamt hlunnindum eftir breytinguna 3.850.000 kr. Segir stofnunin að fyrirliggjandi breyting valdi því að sú hækkun sem orðið hafi á launum og hlunnindum bankastjórans, frá yfirtöku ríkisins á bankanum, hafi nú verið dregin til baka.
Þá barst Bankasýslunni tölvubréf frá Helgu Björk Eiríksdóttur, formanni bankaráðs Landsbankans, fyrr í dag þar sem fram kemur að bankaráðið hafi ákveðið að launahækkun Lilju Bjarkar Einarsdóttur, bankastjóra Landsbankans, frá 1. apríl 2018 hafi verið tekin til baka. Á móti komi hins vegar vísitöluhækkun frá 1. júlí 2017 til 1. janúar 2019 sem nemi 7,81%.
„Grunnlaun bankastjóra eftir lækkun verða 3.297 þúsund krónur og bifreiðahlunnindi 206 þúsund krónur. Heildarlaun bankastjóra verða því 3.503 þúsund krónur. Með þessari ákvörðun er komið til móts við sjónarmið sem fjármálaráðherra lagði fram í bréfi sínu til Bankasýslu ríkisins 28. febrúar síðastliðinn.“
50% fjölgun kærumála og aukið álag
„Eins og ef Alþingishúsið brynni hér“
Vorum kannski ekki bara „hrópandi í eyðimörkinni“
Íranar hafi vísvitandi gætt hófs
Trump mætir fyrir dóm í fyrsta sakamálinu
Forsetafylgismenn dregnir í dilka
Íslenska ríkið dæmt brotlegt