Marel stefnir á skráningu í Amsterdam

Marel hyggur á hlutafjárútboð og skráningu í Euronext-kauphöllina í Amsterdam á öðrum ársfjórðungi 2019 til viðbótar við skráningu sína í Nasdaq-kauphöllinni á Íslandi. Í útboðinu verða boðnar til sölu allt að 100 milljónir nýrra hluta (sem samsvara um 15% af útgefnu hlutafé). 

Í tilkynningu frá Marel kemur fram að skráning hlutabréfa félagsins í Euronext-kauphöllina í Amsterdam, til viðbótar við íslensku kauphöllina, muni auka sýnileika Marel og aðgengi að breiðari hópi alþjóðlegra fjárfesta. Útboð á nýju hlutafé mun einnig styrkja fjárhagsskipan félagsins og verða hlutirnir skráðir í gjaldmiðli sem styður betur við stefnu félagsins um framtíðarvöxt og möguleg fyrirtækjakaup.

Marel var stofnað árið 1983 og framleiðir hátæknibúnað til vinnslu matvæla, heildarlausna, hugbúnaðar og þjónustu fyrir kjúklinga-, kjöt- og fiskiðnað. Yfir 6.000 manns starfa hjá félaginu í yfir 30 löndum og 6 heimsálfum. Heildartekjur Marel á árinu 2018 námu 1,2 milljörðum evra. Um 35% af heildartekjum félagsins koma frá þjónustu og sölu varahluta sem eru reglulegar tekjur og óháðar hagsveiflum og breytingum á eftirspurn á alþjóðamörkuðum, samkvæmt tilkynningu.

Marel fjárfestir árlega um 6% af heildartekjum í nýsköpun og vöruþróun og hefur gert um árabil. Félagið hefur einnig þróað sinn eigin hugbúnað fyrir matvælavinnslu. Hugbúnaðurinn hefur verið settur upp í um 2.000 verksmiðjum um allan heim.

Marel stefnir að 12% meðalvexti á ári á tímabilinu 2017-2026, þar af um 4-6% með innri vexti og um 5-7% í gegnum fyrirtækjakaup. Á sama tímabili er gert ráð fyrir að markaður með búnað til matvælavinnslu fyrir kjúkling, kjöt og fisk muni vaxa um 4-6% árlega.

„Frá skráningu félagsins í Kauphöllina á Íslandi árið 1992 hafa heildartekjur þess vaxið að meðaltali um 22% á ári, bæði með innri og ytri vexti. Hluthafar félagsins eru um 2.500 talsins og er Marel langstærsta félagið á markaði hérlendis, en stærð þess nemur um 36% af markaðsverðmæti allra skráðra félaga í Nasdaq-kauphöllinni á Íslandi. Tvíhliða skráning hlutabréfa félagsins í Euronext-kauphöllina í Amsterdam er því eðlilegt næsta skref í frekari framþróun og vaxtarstefnu félagsins,“ segir enn fremur í tilkynningu.

Árni Oddur Þórðarson, forstjóri Marel, segir í tilkynningu: „Þetta er stór dagur fyrir Marel, þar sem við tilkynnum um fyrirætlanir okkar um hlutafjárútboð og skráningu í Euronext-kauphöllina í Amsterdam. Við störfum á ákaflega spennandi vaxtarmarkaði, þar sem aukin fólksfjölgun, stækkun millistéttarinnar og stækkun borgarsamfélaga drífur áfram eftirspurn eftir hágæða matvælum sem eru framleidd á sjálfbæran og hagkvæman hátt. Marel er staðsett í miðju þessara drifkrafta og í samstarfi við  viðskiptavini höldum við áfram að kynna hátæknivörur, hugbúnað og þjónustu sem eykur afköst og nýtingu og minnkar sóun. Skráningin í Euronext í Amsterdam mun styðja við markmið okkar um 12% árlegan meðalvöxt tekna á tímabilinu 2017-2026 sem byggir á öflugri markaðssókn og nýsköpun, samvinnu við lykilsamstarfsaðila ásamt kaupum á fyrirtækjum.“

• Blogga um frétt