Söluaukning nemur 60-70% í sólinni

„Það hefur gengið frábærlega hjá okkur á þessum tíma og hefur einstakt veðurfar á suðvesturhorninu þar mikið að segja,“ segir Vigfús G. Gíslason, framkvæmdastjóri Flügger lita, við Morgunblaðið.

Vísar hann í máli sínu til þess að metsala hefur verið í útivörum hjá Flügger litum það sem af er ári og nemur söluaukningin um 60-70% milli ára. Tæplega helmingur allrar veltu hjá fyrirtækinu er útivörur og er það veðurblíðan undanfarnar vikur sem á sinn þátt í sölunni.

„Sumarið í fyrra var auðvitað ekki gott veðurfarslega séð þannig að það er gríðarlega jákvætt,“ segir Vigfús í umfjöllun um mál þetta í Morgunblaðinu í dag.