Hlutabréf í flugfélaginu Icelandair halda áfram að lækka, en það sem af er degi hafa bréfin lækkað um 1,2% í 128 milljóna króna viðskiptum. Gengi hlutabréfanna stendur nú í 9,80 krónum.
Hlutabréf Icelandair hríðféllu í gær og nam lækkunin 4,69%. Bréfin hafa nú lækkað um rétt 7% það sem af er júlímánuði, og er gengi bréfanna nú á svipuðum stað og um áramótin.
Lækkunin kemur í kjölfar frétta af framlengingu kyrrsetningar Boeing 737 MAX-flugvéla félagsins. Ráðgert að kyrrsetningin muni vara til loka október hið minnsta.
Þá greindi ViðskiptaMogginn frá því í gær að flugfélagið Emirates kannaði nú möguleikann á því hefja flug til Íslands. Þá greindi Fréttablaðið frá því að fyrrverandi starfsmenn WOW air væru að vinna að því að stofna nýtt lággjaldaflugfélag á grunni WOW. Væru þeir meðal annars komnir með stuðning frá írskum fjárfestingasjóði í eigu Aislinn Whittley-Ryan, dóttur eins af stofnendum Ryanair.
Svo virðist sem framangreindar fregnir hafi orðið til þess að tiltrú fjárfesta á félaginu hafi minnkað.