Arion banki hf. hefur boðað til hluthafafundar 9. ágúst klukkan 16 í höfuðstöðvum bankans í Borgartúni í Reykjavík. Rétt til setu og atkvæðagreiðslu hafa allir hluthafar bankans og er atkvæðavægi í hlutfalli við eignarhlut.
Til stendur að kjósa tvo nýja menn í stjórn bankans og munu þeir sitja fram að næsta aðalfundi bankans. Kaupskil, dótturfélag þrotabúsins Kaupþings seldi í vikunni 20% eignarhlut sinn í bankanum og var breski vogunarsjóðurinn Lansdowne Partners meðal kaupenda en hann á nú 5,01% hlut í bankanum.
Framboðsfrestur til stjórnar rennur út 4. ágúst klukkan 16.