Georgieva verður forstjóri AGS

Hin búlgarska Kristalina Georgieva var í dag formlega tilnefnd af Evrópusambandinu til þess að veita Alþjóðagjaldeyrissjóðnum forystu. Georgieva er núverandi framkvæmdastjóri Alþjóðabankans.

Hún er 65 ára gömul og doktor í hagfræði frá hagfræðiháskólanum í Sofíu í Búlgaríu, en hefur auk þess stundað nám og rannsóknir við London School of Economics og MIT í Bandaríkjunum.

Samkvæmt frétt AFP um málið voru aðildarríki Evrópusambandsins allt annað en einhuga um niðurstöðuna, en Jeroen Dijsselbloem fjármálaráðherra Hollands hafði gert sér vonir um að hreppa stöðuna í kosningu sem fram fór í dag. Fleiri ríki studdu þó Georgievu í starfið.

Hefðin er sú að Evrópubúi skipi þessa æðstu stöðu AGS, sem nú er laus þar sem Cristine Lagarde hefur tekið starfi forstjór Evrópska seðlabankans.

Á Twitter-síðu sinni segir hún að tilnefningin sé heiður og að hún hafi þegar óskað eftir því að taka sér frí frá störfum sem framkvæmdastjóri Alþjóðabankans.

• Blogga um frétt