Breski bankinn HSBC gaf það út í dag að hann hygðist ráðast í miklar hagræðingaraðgerðir á næstunni og segja upp um það bil tveimur prósentum starfsmanna sinna, um 4.000 manns. Framkvæmdastjóri bankans, John Flint, var látinn fara í gær.
Ewen Stevenson fjármálastjóri bankans kynnti fyrirhugaðar uppsagnir fyrir fjárfestum í morgun, en hann lagði áherslu á að flest störfin sem myndu tapast væru störf millistjórnenda og stjórnenda hjá bankanum.
John Flint hafði einungis stýrt bankanum í tæp tvö ár og samkvæmt frétt New York Times um brotthvarf hans sagðist bankinn þurfa nýjan mann í brúna til þess að takast á við „krefjandi alþjóðlegt umhverfi“.