Það er óhætt að segja að gengi hlutabréfa leigubílaþjónustunnar Lyft hafi sveiflast svo um munar eftir birtingu uppgjörs fyrirtækisins fyrir annan ársfjórðung þessa árs í gærkvöldi. Fram kom í uppgjörinu að tekjur í ársfjórðungnum hefðu farið fram úr væntingum fjárfesta sem varð til þess að bréfin hækkuðu um ríflega 11% strax eftir lokun markaða.
Sú hækkun varði þó ekki lengi, en skömmu eftir framangreindar fregnir tilkynnti fyrirtækið að innanbúðarfólk gæti nú selt hlutabréf sín í skutlþjónustunni fyrr en áður hafði verið talið. Strax eftir þessar fregnir hægðist allverulega á hækkuninni og bréfin tóku að lækka verði.
Verðsveiflunum var þó ekki lokið þarna og tóku bréfin að hækka að nýju þegar stjórnendur Lyft greindu frá því að hægst hefði á verðstríði fyrirtækisins við samkeppnisaðila þess, Uber. Þá var einnig greint frá því að tap þessa árs yrði talsvert minna en í fyrra.
Það sem af er degi hefur gengi hlutabréfa Lyft hækkað um 6,13% og stendur nú í 63 Bandaríkjadölum. Heildartekjur fyrirtækisins í ársfjórðungnum voru 867,3 milljónir Bandaríkjadala, sem er 72% hækkun frá sama tímabili í fyrra og um leið nýtt met hjá Lyft.
Við uppgjörið hækkuðu hlutabréf samkeppnisaðilans, Uber, einnig talsvert í verði og nemur hækkunin það sem af er degi rétt um 6,7%. Gengið stendur nú í 42,4 Bandaríkjadölum. Bæði hafa fyrirtækin átt í vandræðum með að halda sig nálægt útboðsgengi sínu, en nýjustu fréttir benda þó til þess að hugsanlega fari eitthvað birta til í þeim efnum.