300 þúsund Haustjógúrtir frá Örnu

Fyrirtækið Arna í Bolungarvík framleiðir 50% meira af Haustjógúrt fyrirtækisins í ár en í fyrra. Framleiðslan í ár nemur 300 þúsund einingum, en framleiddar voru 200 þúsund jógúrtir í fyrra.

Haustjógúrt er eins og nafnið gefur til kynna árstíðabundin vara og er fáanleg frá ágúst til nóvemberloka og unnin úr íslenskum aðalbláberjum.

Að sögn Hálfdáns Óskarssonar, framkvæmdastjóra Örnu, er þetta vinsælasta vara fyrirtækisins. Sjö tonn af íslenskum aðalbláberjum fara í framleiðsluna í ár. Um 20 manns sáu um að tína berin fyrir Örnu í sumar. „Þetta er bara fólk í bænum og hérna í kring. Við auglýstum eftir fólki sem var tilbúið að taka þátt í þessu með okkur. Það hefur skilað góðum árangri,“ segir Hálfdán í samtali í Viðskiptamogganum í dag.