Viðskipti | mbl | 9.10.2019 | 4:51 | Uppfært 5:25

Áætlun WOW air frestast

Michele Ballarin. mbl.is/Kristinn Magnússon

Áætlunum WOW air um að hefja flugferðir að nýju í þessum mánuði hefur verið frestað þangað til í desember. Þetta hefur vefurinn Flightglobal eftir eiganda WOW, Michele Ballarin. Vísir greindi fyrst frá þessu í gærkvöldi.

Yfirlýsing Michele Ballarin, stjórnarformanns USAerospace Associates, þar að lútandi var gefin út í gær en þar eru ekki gefnar neinar nánari skýringar um áætlanir félagsins, það er hvert og hvenær verður flogið og hvaðan. Fram kemur í frétt Flightglobal að USAerospace, sem keypti eignir WOW, hafi ekki svarað neinum tölvupóstum vefjarins.

USAerospace greindi frá því í síðasta mánuði að félagið myndi hefja áætlunarflug WOW að nýju í október.

Frétt af mbl.is

WOW 2 í loftið um miðjan október

Í tilkynningunni nú kemur fram að WOW air verði komið í fulla starfsemi í desember og miðasala hefjist í nóvember. Miklar breytingar hafi átt sér stað í flugrekstri að undanförnu og WOW air muni nýta sér þær til þess að leigja flugvélar sem ekki var hægt að leigja fyrr í sumar.

Undanfarnar vikur hafa nokkur lágfargjaldaflugfélög eins og Thomas Cook, XL Airways og Adria Airways hætt starfsemi.

Ekki hefur verið upplýst nákvæmlega hvað felst í samkomulagi um kaup á eignum WOW air en Ballarin hefur staðfest að félag hennar setji 85 milljónir Bandaríkjadala í að koma WOW air í loftið að nýju. Fyrst verði félagið með tvær flugvélar í rekstri.

Talskona Metropolitan Washington Airports Authority (MWAA), sem rekur Dulles-flugvöll í Washington, sagði við blaðamann FlightGlobal í gær að forsvarsmenn MWAA hafi átt fund með nýjum eigendum WOW í ágúst. Ekkert hafi síðan heyrst frá flugfélaginu síðan og því sé ekki hægt að gefa neinar upplýsingar um fyrirhugaðar áætlanir WOW um að fljúga um flugvöllinn.