Stjórnendur norska lággjaldaflugfélagsins Norwegian hafa ákveðið að leggja niður allt Ameríku- og Asíuflug frá Stokkhólmi og Kaupmannahöfn eftir að núverandi vetraráætlun flugfélagsins rennur út í lok mars á næsta ári.
Jacob Schram var ráðinn forstjóri Norwegian eftir að Bjørn Kjos sagði upp störfum í júlí. Rekstur félagsins hefur verið þungur undanfarið og ákvörðunin sögð tekin í samræmi við stöðu félagsins.
Fram kemur í tilkynningu frá félaginu að frá og með næsta vori verði einungis hægt að fara frá Skandinavíu til annarra heimsálfa frá Osló. Enn fremur kom fram að markaðurinn í Skandinavíu væri einfaldlega of lítill.
Áfram verður hægt að fljúga til Ameríku frá Spáni, Bretlandi, París og Róm.