Rekstrarafkoma ríkissjóðs fyrstu níu mánuði ársins var jákvæð um 8,3 milljarða króna en áætlun gerði ráð fyrir að hún yrði jákvæð um 29,5 milljarða. Rekstrarafkoma er því 21,2 milljörðum lægri en áætlað var. Þetta kemur fram í fréttatilkynningu frá fjármála- og efnahagsráðuneytinu.
Tekjur tímabilsins án fjármunatekna námu 588,7 milljörðum króna og eru 16,4 milljörðum lægri en áætlun gerði ráð fyrir. Helstu frávik eru minni innheimta á tekjuskatti lögaðila upp á 4,5 milljarða króna, virðisaukaskatti upp á 3,1 milljarða króna, vörugjöld af ökutækjum og eldsneyti upp á 3,4 milljarða króna og sala losunarheimilda upp á 1,9 milljarða króna.
Gjöld tímabilsins án fjármagnsgjalda voru 577,3 milljarðar króna sem er 3,7 milljörðum hærri en áætlun gerði ráð fyrir. Fjármagnsjöfnuður er 1,1 milljarði króna lakari en áætlað var. Handbært fé frá rekstri er jákvætt um 30,0 milljarða króna.