Finnsk-íslenska tölvuleikjafyrirtækið Mainframe hefur lokið 7,6 milljón evra, um 1,2 milljarða króna, hlutafjárútboði, en það er hvatasjóðurinn Andreessen Horowitz (a16z) sem er kjölfestufjárfestir í útboðinu ásamt Riot Games.
A16z er einn af þekktari hvatasjóðum heims, en sjóðurinn var meðal annars stór fjárfestir í Facebook og kom snemma inn í Twitter. Hefur sjóðurinn fjárfest í hundruðum nýsköpunarfyrirtækja. Riot Games er líklega þekktast fyrir að hafa gefið út leikinn League of legends (LoL), en það hefur verið einn vinsælasti tölvuleikur heims undanfarin ár, ef ekki sá vinsælasti.
Andreessen Horowitz og Riot Games hafa ekki áður fjárfest í fyrirtækjum á Norðurlöndunum, en með þessu bætast þau í hóp fyrri fjárfesta Mainframe sem eru Maki. vc, Play ventures, Crowberry capital og Sisu game ventures.
Mainframe var stofnað í fyrra, en meðal stofnenda eru reynsluboltar úr tölvuleikjaiðnaðinum sem hafa unnið hjá CCP, Remedy og Next games og unnið að leikjunum EVE Online, Alan Wake og The Walking Dead: No man's land.
Framkvæmdastjóri félagsins er Þorsteinn Gunnarsson, en aðrir stofnendur eru Börkur Eiríksson, Kjartan Pierre Emilsson, Fridrik Haraldsson, Reynir Harðarson, Sulka Haro, Kristján Valur Jónsson, Jyrki Korpi-Anttila, Saku Lehtinen, Ansu Lönnberg, Eetu Martola, Vigfús Ómarsson og Jón Helgi Þórarinsson.
Í tilkynningu vegna útboðsins segir að fyrirtækið vinni nú að því að þróa ónefndan fjölspilaraleik (MMO) sem sé sérstaklega hannaður til spilunar í skýinu. Starfsstöðvar Mainframe eru bæði í Helsinki í Finnlandi og Reykjavík, en samtals starfa þar 20 manns.
Með spilun í skýinu verður hægt að spila leikinn frá tækjum af ýmsum stærðum og gerðum, ýmist snjallsímum, PC-tölvum og leikjatölvum, segir í tilkynningunni. Segir þar að í tileflli fjölnotendaleiks verði bæði leikjavélin og netþjónn í skýinu, en það geri spilurum kleift að nálgast og streyma leiknum með minnstri fyrirhöfn og er vísað til þess sem Netflix og Spotify hafi áður gert á þeim vettvangi fyrir myndefni og tónlist.
„Fyrir frumkvöðla skiptir öllu máli að vinna með fjárfestum sem geta lagt meira á vogarskálarnar en einungis fé sitt,“ er haft eftir Þorsteini Gunnarssyni, framkvæmdastjóra og meðstofnanda Mainframe. „Með djúpstæðri þekkingu á leikjageiranum og ótrúlegu tengslaneti sínu er vart hægt að ímynda sér betri bakhjarla en a16z og Riot í vegferð Mainframe að gera okkar sýndarheim að veruleika.“