„Getur ekki gengið svona áfram“

Stjórn Félags atvinnurekenda (FA) hvetur sveitarfélög eindregið til að lækka álagningarprósentu fasteignaskatts á atvinnuhúsnæði við gerð fjárhagsáætlana fyrir næsta ár. Það muni hjálpa fyrirtækjum að komast út úr kreppunni.

Þetta er kjarninn í ályktun sem stjórn FA samþykkti á fundi sínum í dag. Hún skorar jafnframt á ríkisstjórnina og sveitarfélögin að setjast að samningaborði og semja um nýtt og sanngjarnara kerfi fasteignaskatta á fyrirtæki.

„Núverandi kerfi, þar sem skattlagning fylgir sveiflum í eignaverði, byggist á flóknum reikniformúlum og er fyrir vikið ógegnsætt og ófyrirsjáanlegt, stenst ekki kröfur stjórnarskrárinnar um skýrleika skattlagningarheimilda,“ segir í ályktuninni.

Fyrirtæki þurfa á öllu sínu að halda

FA segir að íþyngjandi skattbyrði vegna hækkana fasteignamats undanfarin ár gerir fyrirtækjum erfitt fyrir að ná sér á strik eftir kreppuna vegna heimsfaraldurs kórónuveiru.

Samkvæmt nýbirtu fasteignamati fyrir árið 2021 hækkar fasteignamat atvinnuhúsnæðis á landinu enn, um 1,7% á landsvísu. Árin 2013  til 2019 hækkaði fasteignamat atvinnuhúsnæðis á landinu um tæplega 70% og á sama tíma hækkuðu álagðir fasteignaskattar á atvinnuhúsnæði úr 15,2 milljörðum króna í 26,7 milljarða króna, eða um 75%.

„Að mati stjórnar FA getur þetta ekki gengið svona áfram. Stjórnin skorar á sveitarfélögin að leggja sitt af mörkum til þess að létta undir með fyrirtækjum, sem þurfa á öllu sínu að halda til að reisa reksturinn við og skapa atvinnu eftir heimsfaraldurinn.“

• 1 blogg um fréttina

Bloggað um fréttina

• Jóhann Elíasson: ER HANN VIRKILEGA AÐ HALDA ÞVÍ FRAM AÐ FASTEIGNAGJÖLDIN SÉU …