Ísland fellur um eitt sæti

Ísland fellur um eitt sæti á lista IMD-viðskiptaháskólans á samkeppnishæfni ríkja og er í 21. sæti, mitt á milli Kína og Nýja-Sjálands. Eftir hækkun um fjögur sæti árið 2019 eru vonbrigði að sú þróun hafi ekki haldið áfram, að því er segir í tilkynningu frá Viðskiptaráði Íslands.

Í efnahagslegri frammistöðu lækkar Ísland úr 54. sæti í 58. sæti og skrifast það að miklu leyti á kólnun hagkerfisins 2019 og verri atvinnuhorfur. Hvað skilvirkni hins opinbera varðar lækkar Ísland um tvö sæti í það 17. Ástæðan er samspil nokkurra þátta, t.d. lakari afkomu hins opinbera og verra mats á regluverki.

Frétt af mbl.is

Best á „þetta reddast“-mælikvarðanum

Skilvirkni atvinnulífs heldur áfram að hækka og er Ísland þar í 15. sæti, sem öðru fremur má þakka hærra mati á stjórnarháttum. Loks fellur Ísland aftur niður í 17. sæti í flokki innviða vegna samspils ólíkra þátta þar sem Ísland hækkar þrátt fyrir allt í þremur af fimm undirflokkum.

Singapúr heldur toppsætinu

Singapúr heldur toppsæti sínu í samkeppnishæfni, en landið hefur um árabil verið mörgum fyrirmynd þegar kemur að samkeppnishæfni, t.d. hvað varðar alþjóðaviðskipti, menntun og tæknivæðingu, að því er segir í tilkynningu Viðskiptaráðs, en næst á eftir Singapúr kemur Danmörk, sem hækkar um 6 sæti í það 2. vegna sterkrar stöðu hagkerfisins. Þar á eftir koma Sviss (3. sæti), Holland (4. sæti) og Hong Kong (5. sæti).

Hin Norðurlöndin hækka og eru ofar Íslandi

Á hæla Hong Kong koma Svíþjóð (6. sæti) og Noregur (7. sæti) sem hækka um nokkur sæti á listanum og þá er Finnland í 15. sæti og hækkar um tvö sæti.

„Þetta þýðir að Norðurlöndin eru öll ofar á listanum en Ísland og hækka á meðan Ísland lækkar. Ísland hefur sjaldan eða aldrei dregist jafn mikið aftur úr Norðurlöndunum og stendur Ísland þeim að baki í flestum undirþáttum. Verður það að teljast talsvert áhyggjuefni þar sem við viljum almennt bera okkur saman við hin Norðurlöndin,“ segir í tilkynningu Viðskiptaráðs.

Hægt er að horfa á blaðamanna- og kynningarfund Viðskiptaráðs vegna samkeppnishæfni Íslands hér að neðan, en hann hefst kl. 9.

• Blogga um frétt