Ná samkomulagi um sölutryggingu hlutafjárútboðs

Icelandair Group hefur náð samkomulagi við Íslandsbanka og Landsbankann um sölutryggingu væntanlegs hlutafjárútboðs félagsins. Samkvæmt samkomulaginu munu bankarnir kaupa, hvor fyrir sig, nýtt hlutafé að andvirði samtals allt að 6 milljarða króna. Þetta kemur fram í fréttatilkynningu Icelandair Group sem var að berast. 

Í tilkynningunni segir jafnframt að endanleg fjárhæð sölutryggingarinnar muni skiptast jafnt milli bankanna. „Samningurinn er háður því skilyrði að áskriftir fjárfesta nái að lágmarki 14 milljörðum króna í útboðinu. Frekari upplýsingar munu verða gerðar aðgengilegar í skráningarlýsingu Icelandair Group sem birt verður í aðdraganda útboðsins,“ segir að lokum í tilkynningunni.

Félagið hefur áður gefið út að það stefni að því að selja hluti fyrir 20 milljarða króna á nafnverði á genginu 1 króna á hlut. Þá hafi stjórn félagsins heimild til að auka hlutafé enn frekar um allt að 3 milljarða komi til umframeftirspurnar, þannig að stærð útboðsins yrði að hámarki 23 milljarðar króna. 

Frétt af mbl.is

Stefnt að hlutafjárútboði í september

• Blogga um frétt