Kerecis allt að 30 milljarða króna virði

Íslenska líftæknifyrirtækið Kerecis hefur margfaldað sölu sína á milli ára og á nýliðnu rekstrarári, sem lauk 30. september síðastliðinn, seldi fyrirtækið vörur fyrir 2,5 milljarða króna.

Guðmundur Fertram Sigurjónsson, forstjóri fyrirtækisins, segir í ítarlegu viðtali í  ViðskiptaMogganum í dag að vonir standi til þess að velta fyrirtækisins muni margfaldast milli ára, rétt eins og raunin hefur verið á síðustu árum.

Hann tjáir sig ekki um mögulegt verðmat á fyrirtækinu en miðað við algenga margfaldara í tæknigeiranum gæti verðmæti þess í dag stappað nærri 30 milljörðum króna.

Guðmundur segir að spurn eftir vörum fyrirtækisins, sem er svokallað sáraroð, unnið úr þorskroði og hefur sannað sig sem öflug leið til að græða sár, m.a. hjá þeim sem misst hafa útlimi, hafi aukist eftir að kórónuveiran setti allt úr skorðum víðast hvar um heiminn.