Gengi hlutabréfa í tölvuleikjaverslunarfyrirtækinu GameStop lækkuðu um 65% þegar Wall Street opnaði í dag. Mikil átök hafa átt sér stað undanfarið á milli almennra fjárfesta og aðila á Wall Street, en stórir vogunarsjóðir höfðu veðjað milljörðum bandaríkjadala á að hlutabréf í GameStop myndu lækka.
Þeir hafa aftur á móti tapað háum fjárhæðum eftir að áhugamenn sem skiptast á ábendingum á samfélagsmiðlum á borð við Reddit ýttu verðinu á hlutabréfunum upp um yfir 700% á einni viku. Nú virðast þær sviptingar sem urðu með umræðum á samfélagsmiðlum hafa misst meðbyr sinn.
Verð á hlut í GameStop varð mest 482 dalir síðasta fimmtudag. Skömmu eftir að kauphallir opnuðu í dag var hluturinn kominn niður í 80 dali, en hann hækkaði síðan aftur í 117 dali um miðjan dag.
Þegar kauphallir lokuðu vestanhafs klukkan 21 að íslenskum tíma í kvöld var hluturinn í 90 dölum.
Fyrir ári síðan var verð á hlut í fyrirtækinu, sem er 37 ára og áformar að loka 450 verslunum á þessu ári, 3,25 dollarar.