„Við erum að tala um að framkvæma útboðið um mánaðamótin maí/júní. Líklega þó í júní en þetta skýrist á næstu vikum,“ segir Bjarni Benediktsson fjármálaráðherra um sölu á 25-35% hlut ríkisins í Íslandsbanka.
„Við erum að leitast við að bankinn fari í dreifða eign við söluna. Svo er ég líka að vonast til að með lækkandi vöxtum og fleiri fjárfestingarkostum haldi sú þróun áfram að fleiri taki þátt á hlutabréfamarkaði og að hér sé kominn fram kostur sem geti stutt þá þróun.“
Fram kom á opnum netfundi með Bjarna að hann telji æskilegt að hægt verði að kaupa hlut fyrir nokkra tugi þúsunda, en lágmarksverð í útboði Icelandair var 250 þúsund.
Hann segir aðspurður í Morgunblaðinu í dag að Bankasýsla ríkisins muni skoða þessa hlið málsins. Lægri þröskuldar muni auka almenna þátttöku í útboðinu.