Sigríður Inga Svarfdal og Björn Ingi Björnsson hafa verið ráðin til YAY. Fyrirtækið er markaðstorg fyrir rafræn gjafabréf frá fjölda fyrirtækja í gegnum app sem nefnist YAY.
Í tilkynningu segir að fyrirtækið hafi vaxið mikið að undanförnu og hafi nú ráðið tvo nýja starfsmenn.
Björn Ingi starfaði áður hjá 365 og Vodafone á sölu- og þjónustusviði. Hann er með meistaragráðu í upplýsingastjórnun frá Háskólanum í Reykjavík.
Sigríður Inga starfaði áður sem markaðsfulltrúi á sölu- og markaðsdeild Reykjavik Excursions. Hún er með menntun í markaðssetningu og almannatengslum frá Háskólanum í Reykjavík.
„Það hefur verið mikill vöxtur hjá YAY þrátt fyrir Covid-19. Við höfum aukið við okkur bæði viðskiptavinum og fyrirtækjum," segir Ari Steinarsson, framkvæmdastjóri YAY í tilkynningunni.
YAY hefur meðal annars séð um ferðagjöfina fyrir íslensk stjórnvöld, sem Íslendingar hafa nýtt sér á ferðalögum innanlands frá síðastliðnu sumri. Fyrirtækið YAY hefur vaxið mjög á stuttum tíma og selur nú gjafabréf frá yfir 140 fyrirtækjum.