Hjalti Már Einarsson hefur verið ráðinn viðskiptaþróunarstjóri hjá Datera og hefur hann þegar hafið störf, að því er greint er frá í tilkynningu frá fyrirtækinu.
Datera sérhæfir sig í ráðgjöf í gagnadrifinni, stafrænni markaðssetningu og birtingum. Hjá Datera mun Hjalti leiða sókn inn á nýja markaði, hjálpa viðskiptavinum við stefnumótun í stafrænni markaðssetningu sem og að veita almenna ráðgjöf en hann hefur verið viðloðandi vefmál og starfræna markaðssetningu í yfir 20 ár.
Síðastliðin 12 ár hefur Hjalti starfað sem forstöðumaður markaðssviðs ferðaþjónustufyrirtækisins Nordic Visitor ásamt því að sitja í framkvæmdastjórn fyrirtækisins. Þá leiddi hann einnig markaðssetningu og vefmál fyrirtækisins, tók þátt í uppbyggingu vörumerkisins á alþjóðamarkaði og tók virkan þátt í vexti þess á alþjóðavísu.
Hjalti er með MS-gráðu í upplýsingatækni og rafrænum viðskiptum frá IT Universitet í Kaupmannahöfn og Bachelor-gráðu í stjórnun og framleiðslu miðla frá Den Grafiske Höjskole í Kaupmannahöfn. Hann hefur setið í stjórn Samtaka vefnaðarins, í faghópi vefstjórnenda hjá SKÝ og í stjórn körfuknattleiksdeildar KR.