Bergþóra Baldursdóttir, hagfræðingur hjá Greiningu Íslandsbanka, segir húsnæðisliðinn vega þyngst í síðustu verðbólgumælingu. Vísitala neysluverðs hefur hækkað um 4,3% sl. tólf mánuði og vísitala neysluverðs án húsnæðis um 3,3%.
Ágúst er því áttundi mánuðurinn í röð þar sem verðbólgan mælist yfir 4% og hefur verðbólgan nú verið yfir 2,5% markmiði Seðlabankans í sextán mánuði samfleytt, frá maí 2020.
Hér til hliðar má sjá þróun verðbólgu frá mars 2020, þegar kórónuveirufaraldurinn hófst á Íslandi. Þá fylgja með upplýsingar um mánaðarlegar breytingar á vísitölu neysluverðs með og án húsnæðis. Eins og sjá má hefur vísitalan að meðtöldum húsnæðisliðnum hækkað meira en vísitalan án hans frá mars sl.
Að sögn Bergþóru vegur undirliðurinn reiknuð húsaleiga 17% af verðbólgunni í ágúst en sá liður er almennt nefndur húsnæðisliðurinn.
„Húsnæðisliðurinn hefur verið meginástæðan fyrir innlendri verðbólgu að undanförnu. Við spáðum því að það færi að hægja á hækkun hans í þessum mánuði, en hækkunin var meiri en við gerðum ráð fyrir,“ segir Bergþóra. Fasteignir hafi hækkað meira í verði að undanförnu en gert var ráð fyrir í spálíkani bankans.
Bergþóra rifjar upp að þegar seðlabankastjóri greindi frá vaxtahækkun í síðustu viku hafi hann sagt að tilgangurinn væri meðal annars að kæla fasteignamarkaðinn.
„Við gætum séð áhrif af því þegar frá líður á næstu mánuðum,“ segir Bergþóra um áhrif hærri vaxta.
Nánari umfjöllun er að finna í Morgunblaðinu sem kom út 31. ágúst.