Fyrirtæki sem tekin voru til gjaldþrotaskipta á fyrsta ársfjórðungi 2022 höfðu um 184 launamenn að jafnaði árið áður sem er um 52% fækkun frá fyrsta ársfjórðungi 2021 þegar launamenn gjaldþrota fyrirtækja á fyrra ári voru 384.
Þetta kemur fram hjá Hagstofu Íslands sem gefur út tölur um gjaldþrot skráðra fyrirtækja í hverjum mánuði.
139 fyrirtæki voru tekin til gjaldþrotaskipta á fyrsta ársfjórðungi þessa árs. Á heildina litið voru áhrif gjaldþrota minni með tilliti til fjölda launamanna í öllum atvinnugreinum en áhrifin voru þó meiri í byggingastarfsemi og mannvirkjagerð þar sem launamenn á fyrra ári voru 109 og 24% fleiri en á fyrsta ársfjórðungi 2021.
Af 139 fyrirtækjum í fyrirtækjaskrá Skattsins, sem tekin voru til gjaldþrotaskipta á fyrsta ársfjórðungi 2022, voru 27 með virkni á fyrra ári, 49% færri en á fyrsta ársfjórðungi 2021.