SKEL kaupir stóran hlut í VÍS

Fjárfestingarfélagið SKEL hefur keypt 2,5% hlut í tryggingarfélaginu VÍS. Tilkynnt var um þetta með flöggun til Kauphallarinnar fyrir stundu en SKEL kaupir 44 milljón hluti í félaginu. Kauðverðið liggur ekki fyrir, en gengi bréfa í VÍS er nú nú um 18,5 kr. á hlut, og hefur hækkað um rúm 4% í dag.

Miðað við markaðsgengi er áætluð kaupupphæð um 818 milljónir króna, en þó ber að ítreka að upphæð viðskiptanna liggur ekki fyrir.

Samhliða þessu hefur SKEL gert framvirka samninga um kaup á tæplega 84 milljón hlutum til viðbótar sem gerðir verða upp síðar í þessari viku og fram til 20. maí. Miðað við markaðsvirði nú má ætla að kaupupphæðin sé tæplega 1,6 milljarður króna.

Verður fjórði stærsti hluthafinn

Eftir að þau kaup eru gengin í gegn mun SKEL eiga um 7,3% hlut í VÍS og verða þar með fjórði stærsti hluthafinn miðað við hluthafalistann nú. Gildi lífeyrissjóður er stærsti hluthafinn með um 8,3% hlut, Lífeyrissjóður verslunamanna á um 7,9% hlut, VÍS heldur á eigin bréfum fyrir um 7,6% og A-deild LSR fer með um 7,3% hlut. Enginn þessara aðila hefur flaggað viðskitpum til Kauphallar en það er ekki gert nema eignarhlutinn fari undir 5%.

Ásgeir Helgi Reykfjörð Gylfason, nýráðinn forstjóri SKEL.

• Blogga um frétt