Allar helstu eldsneytissölur landsins, nema Orkan, hafa hækkað verð á bensínlítra um sex krónur á tveimur dögum.
Á miðvikudaginn var lítraverð á bensíni undir 300 krónum á þremur af fimm stærstu þjónustuaðilunum. Nú eru allar stöðvarnar aftur komnar yfir þann múr.
Í kvöld, föstudag, hafa allir stærstu þjónustuaðilarnir hækkað verð um nákvæmlega 6 krónur á lítrann, nema Orkan sem hefur ekki breytt verði sínu síðan í gær, en á miðvikudag kostaði bensín þar 299,8 krónur á lítrann en degi síðar 303,8 krónur sem er hækkun um þrjár krónur.
Atlantsolía, Olís, ÓB og N1 hafa hækkað lítraverð á bensíni um sex krónur síðan á miðvikudag.
Lítraverð af bensíni var 27. apríl hjá Atlantsolíu og ÓB 299,9 krónur, 302,8 krónur hjá Olís en dýrast hjá N1, 302,9 krónur, en er alls staðar 6 krónum hærra tveimur dögum síðar.
Enginn afsláttur er tekinn með í þessum tölum en eftir sem áður er ódýrasta bensínið í Costco, 267,8 krónur lítrinn, og er nú dýrast á N1, 308,9 krónur.