Ræstingarfyrirtækið Sólar ehf. hefur flutt höfuðstöðvar sínar í gömlu póstdreifingarmiðstöðina að Dalshrauni 6 í Hafnarfirði. Hjá fyrirtækinu, sem er það annað stærsta sinnar tegundar á landinu, starfa um 400 manns eftir því sem fram kemur í tilkynningu frá fyrirtækinu.
Þórsteinn Ágústsson, framkvæmdastjóri Sólar, segir að ráðist hafi verið í miklar endurbætur á húsnæðinu til að aðlaga það sem best að starfsemi fyrirtækisins.
„Húsnæðið er sérhannað fyrir reksturinn eftir að ráðist var í mikla greiningarvinnu á þörfum hverrar deildar fyrir sig. Skrifstofuaðstaðan er mun betri en við höfum áður kynnst og var lögð mikil áhersla á funda- og næðisrýmin, sem eru alls níu talsins,“ segir Þórsteinn í tilkynningunni.
Sólar ehf. hefur verið starfrækt frá árinu 2002 en á meðal viðskiptavina fyrirtækisins eru Reitir, Tækniskólinn og Íslandspóstur.