Íslenska hugbúnaðarfyrirtækið Kara connect hefur safnað 6 milljónum evra, eða sem nemur um 850 milljónum króna, í fjármögnunarferli sem leitt var af Iðunni framtakssjóði.Eftir fjármögnunina verður Iðunn stærsti hluthafi Köru, en fyrir höfðu meðal annars Nýsköpunarsjóður atvinnulífsins, Crowberry capital og aðrir einkafjárfestar fjárfest í félaginu. Kara býður upp á lausnir fyrir fjarheilbrigðisþjónustu.
Í tilkynningu vegna fjárfestingarinnar segir að fjármögnunin verði nýtt til að byggja upp sölu- og markaðsteymi fyrir erlenda markaði. Segir þar jafnframt að Kara bjóði upp á aðgengislausn sem eigi vel við heilbrigðis- og velferðarsviðið.
Pétur Richter fjárfestingastjóri Iðunnar mun taka sæti í stjórn Köru í kjölfar fjármögnunarinnar. Í tilkynningunni er haft eftir honum að stefnan sé nú sett á frekari landvinninga erlendis.
Iðunn framtakssjóður slhf. er sérhæfður framtakssjóður sem leggur áherslu á fjárfestingar á sviði lífvísinda og heilsutækni. Sjóðurinn er 7,3 milljarðar króna að stærð. Fjárfestingartímabil Iðunnar er 5 ár og horft er til fyrirtækja með áætlanir um viðskiptaþróun og stjórnendagetu til að stýra vexti og undirbúa félögin í næsta fasa uppskölunar. Kara Connect er þriðja fjárfesting Iðunnar en áður hefur Iðunn fjárfest í samheitalyfjaframleiðandanum Coripharma og lyfjaþróunarfélaginu EpiEndo Pharmaceuticals.
Kara var stofnað árið 2015 af Þorbjörgu Helgu Vigfúsdóttur fyrrverandi borgarfulltrúa og námssálfræðingi og Hilmari Geir Eiðssyni hugbúnaðarsérfræðing.