Félögin Aztiq og Innobic Asia (Innobic), undir nafninu Aztiq II HoldCo, hafa tekið við 100% hlut í Alvogen Emerging Markets Holding Limited (AEMH) af Alvogen Lux Holding Sarl (Alvogen) en AEMH á leiðandi hlut í Lotus Pharmaceutical og á Adalvo að fullu.
Þetta kemur fram í tilkynningu frá Aztiq.
„Aztiq II HoldCo er þar með orðinn leiðandi hluthafi í alþjóðlega lyfjafyrirtækinu Lotus Pharmaceutical og hefur eignast Adalvo að fullu. Aztiq, með Róbert Wessman í broddi fylkingar, annast rekstur Aztiq II HoldCo. Þá verður Róbert Wessman áfram stjórnarformaður Lotus og Adalvo,“ segir í tilkynningunni.
Nýja félagið stefnir á áframhaldandi þróun og vöxt Lotus og Adalvo á alþjóðavettvangi.
„Ég er afar stoltur af því starfi sem unnið hefur verið bæði hjá Lotus og Adalvo og það er ánægjulegt að sjá hve þau hafa vaxið og dafnað að undanförnu,“ er haft eftir Róberti í tilkynningu.