Landsvirkjun hagnaðist um 14,7 milljarða

Landsvirkjun hagnaðist um 14,7 milljarða kr. á fyrsta ársfjórðungi þessa árs samanborið við um fjóra milljarða kr. á sama tímabili í fyrra. 

Þetta kemur fram í þriggja mánaða uppgjöri fyrirtækisins.

„Rekstur Landsvirkjunar gekk vel á fyrsta ársfjórðungi í afar krefjandi umhverfi sem einkenndist af mikilli eftirspurn eftir raforku, langvarandi dræmu innrennsli til lóna og tíðum óveðrum á rekstrarsvæðum fyrirtækisins.  Afhending forgangsorku jókst um 2% til stóriðju og um 20% til heimila og smærri fyrirtækja. Á tímabilinu þurfti hins vegar að grípa til tímabundinna skerðinga á skerðanlegum raforkusamningum, en þeim hefur nú verið aflétt,“ segir Hörður Arnarson, forstjóri Landsvirkjunar í tilkynningu. 

Helstu atriði árshlutareiknings

• Hagnaður fyrir óinnleysta fjármagnsliði nam 82,5 milljónum USD (10,6 mö.kr.), en var 50,1 milljón USD á sama tímabili árið áður og hækkar því um  64,5%. 
• Hagnaður tímabilsins var 115,2 milljónir USD (14,7 ma.kr.), en var 31 milljón USD á sama tímabili árið áður.
• Rekstrartekjur námu 164,8 milljónum USD (21,1 mö.kr.) og hækka um 34,1 milljón USD (26,1%) frá sama tímabili árið áður.
• Nettó skuldir lækkuðu um 110 milljónir USD (14,1 ma.kr.) frá áramótum og voru í marslok 1.390,9 milljónir USD  (178 ma.kr.).
• Handbært fé frá rekstri nam 131 milljón USD (16,8 mö.kr.), sem er 53,4% hækkun frá sama tímabili árið áður.
• Meðalverð til stórnotenda án flutnings var 41 USD á megavattstund, sem er hæsta verð á einum ársfjórðungi í sögu Landsvirkjunar.

Hagnaður fyrir óinnleysta fjármagnsliði aldrei verið hærri

Hörður segir ennfremur, að hagnaður fyrir óinnleysta fjármagnsliði, sem gefi að mati stjórnenda skýrasta mynd af afkomu félagsins, hækki um 64,5% frá fyrra ári og hafi verið 10,6 milljarðar og hafi áður ekki verið hærri.  Aukinn hagnað megi einkum rekja til hækkunar á raforkuverði til stórnotenda. „Hagnaður tímabilsins eftir skatta var 14,7 ma.kr, 3,7 faldast frá fyrra ári, en um helming hagnaðarins má í þetta sinn rekja til óinnleystra fjármagnsliða.“

Þá kemur fram, að sjóðstreymið hafi verið afar sterkt á tímabilinu, eða 16,8 milljarðar og skilaði það sér að mestu, eða 14,1 milljarður, í lækkun á nettó skuldum.

Mikið mæddi á starfsfólki Landsvirkjunar

„Meðalverð til stórnotenda án flutnings var hærra en það hefur áður verið í sögu Landsvirkjunar, eða 41 dollarar á megavattstund. Í kjölfar endursamninga á síðustu misserum er nú svo komið að flestir viðskiptavinir Landsvirkjunar borga verð sem er sambærilegt við það sem gengur og gerist í þeim löndum sem við berum okkur helst saman við. Þessi ánægjulega þróun er í samræmi við hlutverk okkar, að hámarka verðmæti þeirra endurnýjanlegu orkulinda sem fyrirtækinu er trúað fyrir og skila arðinum til eigenda okkar, íslensku þjóðarinnar.

Rekstur aflstöðva gekk áfram vel á tímabilinu, þrátt fyrir áskoranir vegna óveðra í febrúar og erfiðleika í vatnsbúskapnum, en ársfjórðungurinn var einn sá erfiðasti í sögu fyrirtækisins í þeim efnum. Mikið mæddi á starfsfólki Landsvirkjunar við þessar krefjandi aðstæður og er því full ástæða til að þakka því fyrir vel unnin störf,“ segir Hörður. 

• Blogga um frétt