Listamaðurinn Tolli stofnar Tolla ehf.

Myndlistarmaðurinn Þorlákur Hilmar Morthens, betur þekktur sem Tolli, hefur stofnað einkahlutafélagið Tolli ehf. í kringum listsköpun sína og tengda starfsemi. Þetta má sjá í hlutafélagaskrá.

Hlutafé hins nýja félags er tæpar tvær milljónir króna. Samkvæmt skráningu er tilgangur félagsins listsköpun, kaup og sala fasteigna, útleiga og rekstur fasteigna ásamt almennum fjárfestingum.

Tolli segir í samtali við ViðskiptaMoggann að hann hafi hingað til rekið þessa starfsemi á eigin kennitölu. Það sé ekki skynsamlegt til lengdar, enda séu umsvifin talsverð. „Ég er bara að prófa þetta og svo sjáum við til,“ segir Tolli.

Nær faglegri umgjörð

Tolli hefur í gegnum tíðina gefið út bækur og annan varning í gegnum fyrirtækið Stríðsmenn andans.

„Ég kann ýmislegt fyrir mér en ég er ekkert sérstakur í svona rekstrardæmi. Ég er góður í að afla peninga, en þeir hafa mikið frelsi og geta farið. Ég er að reyna að ná faglegri umgjörð utan um þetta allt,“ segir Tolli.

Lestu meira um málið í ViðskiptaMogganum í dag.