Minni hagnaður hjá Marel

Marel hagnaðist um 9,6 milljónir evra á öðrum ársfjórðungi. Met var sett í mótteknum pöntunum á fjórðungnum.

Til samanburðar hagnaðist félagið um 23,3 milljónir evra á öðrum ársfjórðungi í fyrra.

Þá hagnaðist félagið um 31,3 milljónir evra á fyrri hluta ársins en um 44,5 milljónir evra á fyrri hluta árs í fyrra. 

Endurskoðuð til lækkunar

Markmið um EBIT-framlegð hafa verið endurskoðuð í 14-16% í lok árs 2023 í stað 16% áður, „í ljósi umróts í aðfangakeðjum og alþjóðlegu efnahagsumhverfi“.

Hlutabréfaverð í Marel hríðféll í síðustu viku eftir að fyrirtækið gaf út afkomuviðvörun.

Líkt og mbl.is greindi frá í síðustu viku hyggst Marel fækka starfsfólki um 5% á heimsvísu vegna krefjandi rekstrarumhverfis. Í bráðabirgðauppgjöri fyrirtækisins segir að rekstrarniðurstaða félagsins á öðrum ársfjórðungi sé undir væntingum. Verkefnastaðan sé þó góð og drifin áfram af nýsköpun og aukinni markaðssókn um heim allan.

Reynt að draga úr töfum

Í tilkynningu frá Marel segir að gert sé ráð fyrir betri afkomu á síðari hluta ársins.

„Gert er ráð fyrir bættri rekstrarafkomu á síðari helmingi ársins. Til að lækka kostnað hefur sú ákvörðun verið tekin að fækka starfsmönnum félagsins um 5% á heimsvísu, auk þess sem ráðist hefur verið í aðgerðir til að draga úr töfum í aðfangakeðju. Hærri tekjuvöxtur og virk verðstýring á vörum Marel munu leiða til betri kostnaðarþekju á næstu ársfjórðungum,“ segir meðal annars í tilkynningunni.

Þá er vikið að kaupum Marel á Wenger og Sleegers.

„Kaupin á Wenger og Sleegers höfðu jákvæð áhrif á mótteknar pantanir í fjórðungnum (16,9 milljónir evra), tekjur (12,7 milljónir evra) og pantanabók (80,9 milljónir evra),“ segir þar orðrétt.

• Blogga um frétt