Rökrétt skref að kanna samruna við Íslandsbanka

„Við höfum náð miklum árangri, meðal annars með því að sameina fjármálafyrirtæki. Það er því rökrétt skref að kanna hvort samruni við Íslandsbanka sé skynsamlegur,“ segir Marinó Örn Tryggvason, forstjóri Kviku, í samtali við Morgunblaðið. Kvika óskaði í gær eftir því við stjórn Íslandsbanka að hefja samrunaviðræður milli félaganna.

Marinó Örn segir að samruni Kviku og TM hafi gengið vel og þeim markmiðum sem sett voru við samrunann hafi flestum verið náð.

„Með því að stækka enn frekar, til dæmis með sameiningu við Íslandsbanka, tel ég að enn frekari tækifæri komi í ljós. Ég vona að stjórn Íslandsbanka deili þessari sýn okkar og taki ósk okkar um viðræður vel,“ segir hann. Stjórn Íslandsbanka svarar erindinu á næstu dögum.