Breytingar á lögum um sértryggð skuldabréf taka gildi í dag. Um er að ræða innleiðingu á tilskipun frá Evrópusambandinu, sem snýr að áhættuskuldbindingum í formi sértryggðra skuldabréfa og er ætlað að samhæfa reglur aðildarríkja um sértryggð skuldabréf og skapa sameiginlegan og einsleitan markað með bréfin. Markmiðið með breytingunum er að auka fjárfestavernd og efla eftirlit með útgáfu sértryggðra skuldabréfa.
Lög um sértryggð skuldabréf tóku fyrst gildi árið 2008 og voru fyrstu sértryggðu skuldabréfin gefin út hér á landi árið 2011. Með sértryggðum skuldabréfum er átt við skuldabréf sem njóta ákveðins forgangs í kröfuréttarröð fari svo að útgefandi bréfanna verði gjaldþrota. Er skuldabréfaútgáfan sértryggð með sérstökum tryggingum innan fjármálafyrirtækisins, sem kröfuhafar geta gengið að fari allt á versta veg. Sértryggð skuldabréf eru því mjög áhættulítill fjárfestingarkostur. Útgáfa sértryggðra skuldabréfa nam í lok ársins 2021 tæpum 630 milljörðum króna að bókfærðu virði, sem nemur um 14% af efnahagsreikningi stóru viðskiptabankanna þriggja.
Jón Guðni Ómarsson, framkvæmdastjóri fjármála hjá Íslandsbanka, segir að til lengri tíma litið sé um að ræða mjög jákvætt skref.
Lestu meira um málið í ViðskiptaMogganum í dag.