Eignast meirihluta í Þörungaverksmiðjunni
Þörungar og púður
- Þörungaverksmiðjan hf. var stofnuð á Reykhólum árið 1986.
- Undanfari Þörungaverksmiðjunnar var Þörungavinnslan hf. sem hóf starfsemi á sama stað árið 1975.
- Dupont er eitt stærsta efnaframleiðslufyrirtæki heims.
- Það var stofnað árið 1802 í Delaware í Bandaríkjunum til að framleiða púður í byssuskot.
Bandaríska stórfyrirtækið DuPont hefur keypt heilsuvöruframleiðslu bandaríska fyrirtækisins FMC Corporation og þar á meðal meirihlutann í Þörungaverksmiðjunni hf. á Reykhólum.
Magnús Helgason, sem situr í stjórn þörungaverksmiðjunnar, segir að ekki sé reiknað með að þessi viðskipti hafi áhrif á starfsemi verksmiðjunnar.
Viðskiptin tengjast samruna fyrirtækjanna DuPont og Dow Chemicals, sem tilkynnt var um árið 2015 og á koma til framkvæmda á síðari hluta þessa árs. DuPont hefur nú selt hluta af efnaframleiðslu sinni til FMC og keypt á móti heilsuvöruframleiðsluna.
Á 71,6% hlutafjár
FMC Corporation er skráð fyrir 71,6% hlutafjár í Þörungaverksmiðjunni hf., Byggðastofnun á 27,7% hlut og aðrir hluthafar eru um 70.
Magnús, sem situr í stjórn verksmiðjunnar fyrir hönd Byggðastofnunar, segir að þeim skiljist að DuPont muni nýta sér það hráefni, sem framleitt er á Reykhólum og því sé ekki gert ráð fyrir öðru en starfsemi þar verði með sama hætti og verið hefur.
Klóþang og hrossaþari
Þörungaverksmiðjan framleiðir mjöl úr klóþangi og hrossaþara úr Breiðafirði. Fram kemur á heimasíðu verksmiðjunnar, að meira en 95% af framleiðslunni sé til útflutnings og helstu markaðir séu Skotland, Bandaríkin, Bretland, Noregur, Holland, Þýskaland, Frakkland, Japan og Taívan.
Mjölið hafi mjög góða bindieiginleika vegna mikils innihalds svokallaðra gúmmíefna í mjölinu. Það sé framleitt að miklu leyti fyrir fyrirtæki sem áframvinni efnið til að einangra gúmmíefnin til áframvinnslu í ýmiskonar iðnaði, svo sem matvæla-, snyrtivöru-, lyfja- og textiliðnaði. Öll framleiðsla Þörungaverksmiðjunnar hefur lífræna vottun og grundvallast meðal annars á sjálfbærri nýtingu á þangi og þara úr Breiðafirði.
Bloggað um fréttina
Lestu meira með vikupassa!
Fáðu þér vikupassa fyrir 2.185 kr. og þú færð aðgang að öllu efni úr blaði dagsins í dag og næstu 6 daga.
