Vonandi hörkuvertíð að hefjast

„Þegar við héldum í land með þennan afla var þetta farið að líta vel út á miðunum og við höfðum fréttir af því að mikið af fiski væri sunnan línunnar. Þessi fiskur á eftir að koma inn í færeysku lögsöguna og vonandi er hörkuvertíð að hefjast.“

Þetta er haft eftir Hjörvari Hjálmarssyni, skipstjóra á Berki NK, á vef Síldarvinnslunnar. Börkur var í morgun staddur í brælu um 80 mílur norðvestur úr Mykinesi.

Fram kemur að Börkur hafi komið með 2.250 tonn af kolmunna til Neskaupstaðar í gær. Hélt hann strax til veiða á ný að löndun lokinni.

Bjarni Ólafsson AK kom þá í gær með tæplega 1.700 tonn til löndunar á Seyðisfirði og í nótt kom Beitir NK þangað með um 3.000 tonn til viðbótar.

„Vonandi eiga veiðarnar eftir að ganga eins og í sögu, það er alla vega nægur kvóti,“ er haft eftir Gunnari Sverrissyni verksmiðjustjóra, en vinnsla hófst strax í fiskimjölsverksmiðjunni.

Var að skríða inn í lögsöguna

Segir einnig á vef Síldarvinnslunnar að kolmunnaveiðin í færeysku lögsögunni hafi almennt hafist hjá íslensku skipunum um miðja síðustu viku. 

„Kolmunninn var þá að byrja að skríða inn í lögsöguna en fyrstu dagana eftir að veiðar hófust var ekki mikið að sjá. Hægt og bítandi jókst þó það sem sást og að því kom að alvöru lóð voru sjáanleg.“

Börkur í skipaskrá 200 mílna

• Blogga um frétt