Samstarf í Færeyjum í óvissu

Hugmyndir Færeyinga um að banna eignaraðild útlendinga í sjávarútvegsfyrirtækjum þar í landi eru brot á svonefndum Hoyvíkursamningi sem tryggja á gagnkvæmt viðskiptafrelsi milli Íslands og Færeyja.

Nú mega erlendir aðilar eiga þriðjung í útgerð ytra, en frumvarp sem liggur fyrir færeyska lögþinginu gerir ráð fyrir að sú heimild verði felld úr gildi á nokkrum árum, að því er fram kemur í umfjöllun um mál þetta í Morgunblaðinu í dag.

Sjónarmiðum Íslendinga í málinu hefur verið komið á framfæri. „Við erum sannfærð um að farið verði vel og málefnalega yfir ábendingar,“ segir Guðlaugur Þór Þórðarson utanríkisráðherra í blaðinu.