Cuxhaven NC-100, nýtt skip Deutsche Fischfang Union, dótturfélags Samherja í Þýskalandi, hefur haldið á veiðar. Cuxhaven er hannað af Rolls Royce, 80 metra langt og 16 metra breitt, og er smíðað í Mykleburst-skipasmíðastöðinni í Noregi.
Þetta kemur fram í tilkynningu frá Samherja en þar segir að Cuxhaven sé fyrsta nýsmíði Deutsche Fischfang Union í 21 ár. Skipið sem þá var smíðað bar einnig nafnið Cuxhaven.
Eigendur Samherja, ásamt Haraldi Grétarssyni framkvæmdastjóra Deutsche Fischfang Union og Óskari Ævarssyni útgerðarstjóra, tóku á móti skipinu 15. ágúst sl. í Álasundi, að því er fram kemur á vef Samherja. Þá voru veiðarfæri tekin um borð og skipið gert klárt að öðru leyti, og hélt það svo til veiða í Barentshafi 20. ágúst.
Skipstjórar eru þeir Stefán Viðar Þórisson og Hannes Kristjánsson.
Óskar Ævarsson, útgerðarstjóri DFFU, Hannes Kristjánsson skipstjóri, Stefán Viðar Þórisson skipstjóri og Haraldur Grétarsson, framkvæmdastjóri DFFU.
Ljósmynd/Samherji
Áskorun að fá allt til að virka
Í tilkynningunni segir enn fremur að Cuxhaven sé afar vel búið á allan, hátt bæði hvað varðar vélbúnað, vinnslu og aðbúnað áhafnar, sem geti orðið allt að 35 manns.
„Með nýjustu tæknilausnum er skipið mun hagkvæmara í rekstri og umhverfisvænna en eldri skip. Vinnsludekk er hannað og smíðað af Slippnum á Akureyri og Optimar í Noregi og hefur búnað m.a. frá Vélfag á Ólafsfirði,“ segir í tilkynningunni.
„Þetta eru mikil tímamót í rekstri DFFU hér í Þýskalandi,“ er haft eftir Haraldi Grétarssyni, framkvæmdastjóra Deutsche Fischfang Union GmbH.
„Meðal annars hefur allur aðbúnaður áhafnar og vinnuaðstaða verið stórbætt. Það er mikil áskorun að fá allt til að virka í svona tæknilega flóknu skipi og næstu vikur verða því spennandi hjá okkur.“