Tíu stærstu með tæpan helming kvótans

Tíu stærstu útgerðirnar fá úthlutað sem nemur 49,73% af því aflamarki sem Fiskistofa úthlutar fyrir fiskveiðiárið 2017/2018. Alls fá 372 fyrirtæki eða lögaðilar úthlutað aflamarki nú, og fækkar þeim um 26 frá því í fyrra.

Þetta má ráða af gögnum Fiskistofu um úthlutun aflamarks, sem gerð var nú um mánaðamótin.

Fimmtíu stærstu fyrirtækin fá þá úthlutað sem nemur um 87,8% af því aflamarki sem úthlutað er og er það 1,2 prósentustigum hærri tala en í fyrra. Alls fá 372 fyrirtæki eða lögaðilar úthlutað nú eða um 26 aðilum færra en í fyrra. 

Mestu úthlutað fær HB Grandi til sinna skipa, eins og í fyrra, eða 9,5% af heildinni. Næst kemur Samherji með 5,9% og þá Þorbjörn hf. með 5,5%. Þetta er sama röð efstu fyrirtækja og undanfarin ár, að því er fram kemur í tilkynningu frá stofnuninni.

Samdráttur í karfa

Segir þar að að þessu sinni sé úthlutað 375.589 þorskígildistonnum, saman borið við um 365.075 tonn í fyrra. Aukning á milli ára samsvarar því um 10.500 tonnum.

Úthlutun í þorski er um 203 þúsund tonn og hækkar um tæp níu þúsund tonn frá fyrra ári. Ýsukvótinn er þá 31.732 tonn og hækkar um 4.200 tonn, en sama aukning er í ufsakvótanum.

Tæplega 1.700 tonna samdráttur er úthlutun á gullkarfa og tæplega 1.100 tonna samdráttur í  djúpkarfa. Þá er úthlutun í íslenskri sumargotssíld 29.000 tonnum lægri en í fyrra. Úthlutað aflamark er alls 422.786 tonn sem er tæplega 6.600 tonnum minna en á fyrra ári.

• Blogga um frétt