„Algjör mokveiði í nótt“

„Við fórum alveg austur að norsku landhelgislínunni en þar var lítið að hafa. Við tókum þar ein þrjú hol en þau gáfu lítið. Við færðum okkur síðan í miðja Smuguna og þar var algjör mokveiði í nótt sem leið.“

Þetta segir Kristinn Snæbjörnsson, stýrimaður á Beiti NK, sem er á landleið með 1.260 tonn af makríl sem fékkst í Smugunni. Haft er eftir honum á vef Síldarvinnslunnar að framan af veiðiferðinni hafi afli verið tregur en í nótt hafi hins vegar verið mokveiði.

„Við tókum 330 tonn um miðnætti og síðan 650 tonn í morgun. Það voru 300 mílur í land þegar við lögðum af stað og við reiknum með að koma til Neskaupstaðar um kl. 10 í fyrramálið. Almennt má segja að makrílveiðin sé alltaf að færast austar eins og gera má ráð fyrir á þessum árstíma,“ segir Kristinn.

Fram kemur þá að Börkur NK sé á miðunum og hafi hafið veiðar í morgun. Bjarni Ólafsson AK hélt þá til veiða frá Neskaupstað í morgun en lokið var við að landa makríl úr honum í gær.

• Blogga um frétt