Ágætur afli, en löng sigling

Undanfarið hafa íslensku uppsjávarskipin veitt ágætlega af makríl í síldarsmugunni, alþjóðlega hafsvæðinu á milli Íslands og Noregs. Á svipuðum slóðum hafa einnig verið skip frá Hollandi, Rússlandi og fleiri þjóðum.

Löng sigling er á miðin í síldarsmugunni og túrarnir geta tekið 4-5 sólarhringa eftir því hvernig gengur hverju sinni og hvort siglt er til hafna á Austfjörðum eða Vestmannaeyja. Litlar fréttir hafa verið af makríl í íslensku lögsögunni undanfarið og hans ekki sérstaklega verið leitað. Á vef Fiskistofu kemur fram að búið er að landa um 120 þúsund tonnum af makríl á vertíðinni, en kvóti ársins er um 176 þúsund tonn.

Afli krókabáta sem veiddu vel við Reykjanes og víðar í ágústmánuði hefur daprast mjög undanfarið og september hefur verið mun lélegri við Reykjanesið en í fyrra.

Sem dæmi má nefna að í september í fyrra veiddi Axel Helgason, skipstjóri á Sunnu Rós og formaður Landssambands smábátaeigenda, rúmlega 120 tonn af makríl, en til þessa í ár er afli mánaðarins um sex tonn. Aflabrögð við Snæfellsnes voru hins vegar mjög góð fyrstu viku mánaðarins.