Bjartsýnn á góða vertíð fyrir vestan

„Þetta hefur verið ágætiskropp á línu,“ segir Emil Freyr Emilsson, skipstjóri á línubátnum Guðbjarti SH sem er gerður út frá Rifi.

„Það stóð til að við færum til veiða á Skagaströnd í haust en aflinn þar hefur ekkert verið sérstakur svo við höldum okkur við Breiðafjörðinn að sinni,“ segir Emil í samtali við fréttaritara.

Mest af ýsu og þorski

„Við höfum sótt suður fyrir Öndverðarnes og fengið ágætt þar, og höfum fengið sæmilegan afla af löngu í bland með öðrum tegundum,“ bætir hann við og bendir á að aflinn hafi verið um 100 kíló á bala, sem sé ásættanlegt miðað við árstíma og þá staðreynd að sjórinn sé tiltölulega heitur.

„Við höfum annað slagið farið í álinn og þar höfum við líka fengið í kringum 100 kílóin á balann, en þá mest af ýsu og þorski.“

Spurður um fiskverð segist Emil vera sáttur við það.

„Fiskverð hefur þokast upp á við og er ég mjög bjartsýnn að þessi vertíð verði góð.“

• Blogga um frétt