Huga að skipulagi fyrir þörungaverksmiðju

„Ég vonast til þess að á næsta ári verði hægt að hefja einhverjar framkvæmdir og koma þessu af stað. En til að það gerist þarf að klára skipulag, ráðuneytið að gefa út reglur og sækja um leyfi. Það er heilmikið eftir ennþá,“ segir Sturla Böðvarsson, bæjarstjóri í Stykkishólmi.

Áform fyrirtækisins Deltagen Iceland og Matís um að koma upp þörungaverksmiðju í Stykkishólmi virðast komin á rekspöl. Tilkynnt var um þau í mars árið 2015 og síðan þá hefur verið unnið að undirbúningi. Málið var tekið fyrir á fundi bæjarráðs Stykkishólmsbæjar í síðustu viku.

Stefnt er að því að safna þangi og þörungum í Breiðafirði og gera úr þeim þykkni sem flutt verður út í tönkum eða brúsum. Þykknið verður notað sem áburður en einnig til framleiðslu fæðubótarefna og efna í húðkrem og jafnvel lyfja, að því er fram kemur í umfjöllun um mál þetta í Morgunblaðinu í dag.