„Á eftir að koma heilmikil loðna“

„Það var ekki stór bletturinn sem skipin voru að toga á,“ sagði Sturla Þórðarson, skipstjóri á Beiti, eftir að skipið kom til Neskaupstaðar í gærmorgun með rúmlega 2.200 tonn af loðnu.

Hluti af aflanum fór til vinnslu í fiskiðjuveri Síldarvinnslunnar og hófst vinnsla strax, að því er fram kemur á vef Síldarvinnslunnar.

Geir Zoëga, skipstjóri á Polar Amaroq, tók undir með Sturlu og sagði að enn væri ekki mikið að sjá. Skip hans kom einnig til Neskaupstaðar í gærmorgun með 1.650 tonn, þar af voru 650 tonn fryst.

„Mér líst hins vegar ekki illa á vertíðina. Það á eftir að koma heilmikil loðna. Við vorum í vikutúr en vorum einungis tvo daga á veiðum. Þrír daganna fóru í loðnuleit í samstarfi við Hafrannsóknastofnun. Við munum fara í frekari leit eftir löndun og það mun koma maður um borð til okkar frá Hafró áður en við leggjum úr höfn,“ sagði Geir.

Frétt af mbl.is

Loðnuveiðar lofa góðu

• Blogga um frétt