Aflinn jókst um 107 þúsund tonn

Íslenski fiskiskipaflotinn landaði 107 þúsund tonnum meira af afla árið 2017 en árið þar áður. Heildarafli skipanna á nýliðnu ári nam 1.176,5 þúsund tonnum og má rekja hið aukna aflamagn nær eingöngu til meiri loðnu- og kolmunnaafla.

Þetta kemur fram í tilkynningu frá Hagstofunni.

Tæp 197 þúsund tonn veiddust af loðnu á síðasta ári, samanborið við 101 þúsund tonn árið 2016. Tæp 229 þúsund tonn veiddust þá af kolmunna samanborið við tæp 187 þúsund tonn árið áður.

Botnfiskafli nam þá tæpum 429 þúsund tonnum á síðasta ári, sem er 6% minni afli en árið 2016.

Verkfallið hafði áhrif í desember

„Að venju er þorskaflinn uppistaðan í botnfiskaflanum en tæp 253 þúsund tonn veiddust af þorski á síðasta ári sem er 4% minna en árið 2016. Flatfiskaflinn dróst saman um 8% milli ára og var tæp 22 þúsund tonn á síðasta ári. Afli skel- og krabbadýra nam 10,4 þúsund tonnum árið 2017 samanborið við 12,7 þúsund tonn árið 2016,“ segir í tilkynningunni.

„Í desembermánuði var fiskaflinn rúm 70 þúsund tonn sem er 18% meiri afli en í desember 2016. Aflamagn í desember var meira en árið áður í öllum lykiltegundum nema karfa og síld, en verkfall sjómanna sem hófst 14. desember 2016 hefur áhrif þar á.“

Sjá nánar á vef Hagstofunnar.

• Blogga um frétt