Fengu viðurkenningar fyrir samstarf

Kristján Þór Júlíusson sjávarútvegsráðherra afhenti síðdegis í gær fjórum fyrirtækjum innan Íslenska sjávarklasans viðurkenningar fyrir að hafa skarað fram úr við að efla samstarf við önnur fyrirtæki.

Um er að ræða fyrirtækin Navis, Evris, Iceland Sustainable Fisheries og Knarr Maritime.

Hlýtur Navis viðurkenningu fyrir að efla samstarf tæknifyrirtækja um hönnun á umhverfisvænum skipum og Evris fyrir að efla samstarf við ýmis fyrirtæki innan klasans um þátttöku í alþjóðlegum rannsóknarverkefnum.

Iceland Sustainable Fisheries hlýtur þá viðurkenningu fyrir að hafa komið á víðtæku samstarfi útgerða um vottun á sjávarafurðum og Knarr Maritime fyrir að efla samstarf tæknifyrirtækja um heildstæðar skipalausnir fyrir alþjóðarmarkað.

Þetta er fjórða árið sem Íslenski sjávarklasinn veitir þessar viðurkenningar, en tilgangurinn með viðurkenningunum er sagður sá að hvetja fyrirtæki til að efla samstarf sín í milli og styrkja þannig enn frekar Ísland sem forystuland í sjávarútvegi.