Norðmenn vildu lengri tíma á loðnu

Norsk loðnuskip voru í gær búin að tilkynna um 19 þúsund tonna afla á vertíðinni og eiga þau þá eftir að veiða um 44.000 tonn. Nái Norðmenn ekki að veiða kvóta sinn fyrir 23. febrúar kemur það sem út af stendur í hlut íslenskra veiðiskipa.

Samkvæmt upplýsingum Morgunblaðsins hafa norsk stjórnvöld farið þess á leit við íslensk stjórnvöld að veiðitími norsku skipanna verði framlengdur og þeim verði jafnframt heimilt að nota troll við veiðarnar, en ekki aðeins nót.

Íslensk stjórnvöld hafa hafnað þessari málaleitan, en um dagsetningar og skipulag veiðanna á yfirstandandi vertíð var samið á síðasta ári.