Útlit fyrir að Norðmenn klári kvótann

Allt útlit er fyrir að norsku loðnuveiðiskipin sem verið hafa við veiðar að undanförnu við Íslandsstrendur muni ná að klára kvóta Norðmanna í lögsögunni, sem nemur ríflega 70 þúsund tonnum.

Samkvæmt síðustu tölum hins norska Sildelaget höfðu skipin veitt samtals 69.894 tonn af loðnu og áttu því tæp fjögur þúsund tonn eftir til að ná 73.824 tonna kvótanum.

Leyfi Norðmanna til loðnuveiða í lögsögunni rennur út á miðnætti í kvöld.

Á meðfylgjandi myndum Hafþórs Hreiðarssonar fréttaritara mbl.is má sjá hvar skipin hafa verið að veiðum á Skjálfanda og við Húsavík undanfarna daga. Um sjö til átta norsk skip sáust þar fyrr í dag.